கல்லூரி நாட்கள்

புளியமர கிளை

புங்கைமர நிழல்

சாய்ந்து வளர்ந்த பனை மரம்

தூங்கும் மூஞ்சி மர வேர்

ஏரிக்கரை

வயல் வரப்பு

இங்கு அமர்ந்து படித்தது எல்லாம் மறந்து போயின, 

படித்த இடங்கள் மட்டும் ஞாபகத்தில்.

-சாமி.

மின்னல்

மின்னலாய் ஒரு நொடியில் 

என் மனதில் உள் நுழைந்த நீ,

மறைவதற்கு ( மறப்பதற்கு)

ஏன் என் முழு ஆயுளையும் எடுத்து கொள்கிறாய்.

-சாமி.

புதைக்கப்பட்ட ரகசியம்

நீ உன் மனதில் புதைத்து வைப்பதாக ஒப்புக்கொண்டால்,

உன்னிடம் நாள் முழுவதும் பகிர ஆயிரம்

உணர்வுகள் இருக்கிறது என்னிடம் ரகசியமாய்.

சாலைகள்

சாய்க்கப்பட்ட மலைகள் தான் சாலைகள்

மனசாட்சி உறுத்துகிறது அதன்மீது நடக்கும் போதெல்லாம்.

-சாமி.

அடிகள் அல்ல படிகள்

முத்தம்மாள் சத்திர தரை வகுப்பு

தவறு செய்கையில் அறிவியல் அய்யாவின் காது கிள்ளல்

தமிழில் பிழை ஏற்படுகையில்

தமிழ் அய்யா முதுகில் அடித்த அடி

நேரம் தவறி பள்ளி செல்கையில் உடற்பயிற்சி ஆசிரியர் நடக்க சொன்ன வாத்து நடை

வேதியியல் ஆய்வகத்தில் ஆசிட் மாறியதால் கை பழுக்க வாங்கிய அடி

நண்பர்களுடன் சண்டையிட்டதால் தலைமை ஆசிரியர் 

முட்டிப் போடச் சொல்லி பாதத்தில் அடித்த பிரம்பின் அடி

பாடத்தோடு பழக்க வழக்கங்களையும்

சொல்லி கொடுத்த ஆசான்களின் அடிகள் 

இன்னும் இனிப்பாய்தான் இருக்கிறது மனதில்.

-சாமி.

மனித உறவுகள்

பூக்களின் வண்ணமும் வடிவமும்

பூச்சிகளையும் தேனீக்களையும்

கவர மட்டுமே பயன்படும், ஆனால்

அதன் உறவு நீடித்து நிலைப்பதற்கு பூக்களில் தேன் இருப்பது முக்கியம்.

-சாமி.

மயிலிறகும் அதன் குட்டிகளும்

பள்ளி பருவத்தில்

நோட்டு புத்தகத்தில்

வைத்த மயிலிறகும் அதன் குட்டிகளும்

உயிர்ப்புடன் வாழ்ந்து வருகின்றன 

என் மனதில் இதுநாள்வரை.

-சாமி.