தட்டாமல் திறக்காதே

தேவையில்லாமல் உள்ளேன் ஐயா சொல்வதும் 

தேவைக்கு அதிகமாக உன் இருப்பை காட்டுவதும்

 உன் மதிப்பை மரியாதையை குறைக்கும்.

-சாமி.

இது இரகசியம்

சில ரகசியங்களை மனதில் ஒளித்து வைத்தேன்

 யாரிடமும் சொல்லிவிடாமல் இருக்க

 சிலவற்றை மனதில் ஆழப்புதைத்தேன் கனவில் கூட உளறிவிடாமல் இருக்க

 சில ரகசியங்களை உயிரின் உள்ளுக்குள் வைத்தேன்

 உயிரோடு இருக்கும் வரை பகிர்ந்து விடாமல் இருக்க

 சில ரகசியங்களை ஆன்மாவில் அமிழ்த்தினேன் அடுத்த ஜென்மத்திற்கு எடுத்துச் செல்லலாம் என 

ரகசியத்தின் ரகசிய இடங்களை இக்கவிதையால் கவிழ்த்து வைக்கிறேன் யாருக்கும் தெரியாமல் இருக்க.

-சாமி.

ஆண்கள் தினம்

இந்த உலகத்தால் தினம் தினம்

உதை படும் கால்பந்து உங்கள்

அருகிலேயே இருக்கிறது

உங்களுக்கு தெரியுமா?

வெளியில் எரிமலை

உள்ளுக்குள் பனிமலையை பார்த்து இருக்குறீர்களா?

கடமையை  நிறைவேற்ற தன்

காலம் முழுவதும் கரைத்த ஒரு

ஜீவனை கண்டு இருக்கீறீர்களா?

குடும்பம் என்ற ஒரு வார்த்தை அன்றி

வேறெதுவும் தெரியாத அப்பாவியை கண்டு இருக்கீறீகளா?

இவ்வுலகம் எவ்வளவு அடித்தாலும் தாங்கும்

அப்பிரானியை கண்டதுண்டா?

தன் குடும்பத்தின் சுமையை சுகமாய் 

தாங்கும் சுமைதாங்கியை தெரியுமா?

இவர்கள் யார் என்று தெரிய வேண்டுமா?

அப்பா என்றோ

அண்ணன் என்றோ

கணவன் என்றோ

அழைத்து பாருங்கள்

அருகில் வருவார்.

ஆண்களை கொண்டாடுங்கள்

ஆண்கள் தினத்தை அல்ல.

-சாமி.

சக்கர வியூகம்

எந்த வ(ப)ழக்கமும் நமக்கு

சக்கர வியூகம் தான்,

நாமும் அபிமன்யு தான்.

-சாமி.

உங்களுக்காக கொடுக்க நிறைய இருக்கிறது என்னிடம்

உங்களுக்கு தர நம்பிக்கை என்னிடம் நிறைய இருக்கிறது

 எனக்குத்தான் என்னிடம் இல்லை

 உங்களுக்கு தர ஊக்கம் நிறைய இருக்கிறது எனக்குத்தான் என்னிடம் இல்லை

 உங்களுக்கு தர அன்பு நிறைய இருக்கிறது

 எனக்குத்தான் என்னிடம் இல்லை

 உங்களுக்கு தர செல்வம் நிறைய இருக்கிறது 

எனக்கு நானே செலவழிக்க தான் இல்லை 

உங்களை பாராட்ட வார்த்தைகள் என்னிடம் நிறைய இருக்கிறது

 என்னை பாராட்டிக் கொள்ளத்தான் வார்த்தைகள் இல்லை 

என்னிடம் இருக்கும் எல்லாம் உங்களுக்காக எண்ணும்போது 

எனக்கு தேவையானது உங்களிடமிருந்து வரும் என்ற நம்பிக்கையில் தான் ஓடுகிறது வாழ்க்கை.

-சாமி.

உலகமே ஒரு நாடக மேடை

 நிரந்தரமற்ற மேடையில்

 நித்தம் நித்தம்

நிரந்தரமான நடிப்பு.

-சாமி.

வாழ தொடங்கு

இன்னும் கூட நேரம் ஆகிவிடவில்லை

இன்றே தொடங்கு

தினமும் வாசி 

காலாற நட

முடிந்தால் மூச்சிரைக்க ஓடு

 புன்னகையை அணிந்து கொள்   புதியதாய் கற்றுக் கொள்

 முழு நிலவை ரசி 

 தாய் பூமியை முத்தமிடு   இளஞ்சூரியனோடு பேசு 

 சிரிப்பை கைக்கொள்

இயற்கையோடு இயற்கையாகு

கைபேசியை கைவிடு

உடன் உள்ளோருடன் உரையாடு

துயருக்கு தோள் கொடு

ஆறுதல் கூறு 

முடிந்தவரை உதவு 

முதியவர்களுக்கு காது கொடு குழந்தையோடு குழந்தையாகு

மரத்தை வியந்து பார் 

வானத்தை நிமிர்ந்து பார் 

பறவைகளின் ஒலி கேள்

மழையில் நனைந்து பார் 

பிடித்ததை செய்

எக்கணமும் இல்லை என இக்கணத்தில் வாழ்ந்து பார் 

இன்னும் கூட நேரமாகிவிடவில்லை நீ வாழ்வதற்கு இன்றே வாழ தொடங்கு.

-சாமி.