சாலைகள்

சாய்க்கப்பட்ட மலைகள் தான் சாலைகள்

மனசாட்சி உறுத்துகிறது அதன்மீது நடக்கும் போதெல்லாம்.

-சாமி.

அடிகள் அல்ல படிகள்

முத்தம்மாள் சத்திர தரை வகுப்பு

தவறு செய்கையில் அறிவியல் அய்யாவின் காது கிள்ளல்

தமிழில் பிழை ஏற்படுகையில்

தமிழ் அய்யா முதுகில் அடித்த அடி

நேரம் தவறி பள்ளி செல்கையில் உடற்பயிற்சி ஆசிரியர் நடக்க சொன்ன வாத்து நடை

வேதியியல் ஆய்வகத்தில் ஆசிட் மாறியதால் கை பழுக்க வாங்கிய அடி

நண்பர்களுடன் சண்டையிட்டதால் தலைமை ஆசிரியர் 

முட்டிப் போடச் சொல்லி பாதத்தில் அடித்த பிரம்பின் அடி

பாடத்தோடு பழக்க வழக்கங்களையும்

சொல்லி கொடுத்த ஆசான்களின் அடிகள் 

இன்னும் இனிப்பாய்தான் இருக்கிறது மனதில்.

-சாமி.

மனித உறவுகள்

பூக்களின் வண்ணமும் வடிவமும்

பூச்சிகளையும் தேனீக்களையும்

கவர மட்டுமே பயன்படும், ஆனால்

அதன் உறவு நீடித்து நிலைப்பதற்கு பூக்களில் தேன் இருப்பது முக்கியம்.

-சாமி.

மயிலிறகும் அதன் குட்டிகளும்

பள்ளி பருவத்தில்

நோட்டு புத்தகத்தில்

வைத்த மயிலிறகும் அதன் குட்டிகளும்

உயிர்ப்புடன் வாழ்ந்து வருகின்றன 

என் மனதில் இதுநாள்வரை.

-சாமி.

காத்திருக்கிறேன் கதிரவனே

ஒன்று உன் செங்கதிரை நான் பற்றி

ஏறி வரவேண்டும்,

இல்லையேல்,

என் கரம் பற்றி நீ இறங்கி வர வேண்டும்,

காத்திருக்கிறேன் கதிரவனே

உன்னுடன் ஒரு செல்ஃபி எடுக்க.

-சாமி.

இங்கு எல்லோரும்

தற்கொலைதான் செய்து கொள்கிறார்கள்,

தவணை முறையில்.

கவிஞர் பிரான்ஸிஸ் கிருபா.

கொரானா காலம்

இப்பொழுது

தாடிகள் தப்பிக்கிறது

முக கவசத்தின் கருணையால்.

-சாமி.